òåêñò • ïåðåâîäû • ãðèíôåëüä • commentarii • varialectio • prosodia
Parentis olim siquis inpia manu
senile guttur fregerit,
edit cicutis alium nocentius.
o dura messorum ilia!
5 quid hoc veneni saevit in praecordiis?
num viperinus his cruor
incoctus herbis me fefellit? an malas
Canidia tractavit dapes?
ut Argonautas praeter omnis candidum
10 Medea mirata est ducem,
ignota tauris inligaturum iuga
perunxit hoc Iasonem,
hoc delibutis ulta donis paelicem
serpente fugit alite.
15 nec tantus umquam siderum insedit vapor
siticulosae Apuliae,
nec munus umeris efficacis Herculis
inarsit aestuosius.
at siquid umquam tale concupiveris,
20 iocose Maecenas, precor –
manum puella savio opponat tuo,
extrema et in sponda cubet.
Íà ñàéòå èñïîëüçóåòñÿ ãðå÷åñêèé øðèôò.