òåêñò • ïåðåâîäû • commentarii • varialectio • prosodia
Festo quid potius die
Neptuni faciam? prome reconditum,
Lyde, strenua Caecubum
munitaeque adhibe vim sapientiae.
5 inclinare meridiem
sentis et, veluti stet volucris dies,
parcis deripere horreo
cessantem Bibuli consulis amphoram?
nos cantabimus invicem
10 Neptunum et viridis Nereidum comas:
tu curva recines lyra
Latonam et celeris spicula Cynthiae:
summo carmine, quae Cnidon
fulgentisque tenet Cycladas et Paphon
15 iunctis visit oloribus,
dicetur merita Nox quoque nenia.
Íà ñàéòå èñïîëüçóåòñÿ ãðå÷åñêèé øðèôò.